El llagar Tierra Astur de Cualloto va baillar a ritmu de mecigayu-ska esti xueves cola presentación nesti llocal de “Ö-3-3”, el nuevu discu de La Tarrancha. A partir de les 21.30 entama esta espicha-conciertu nel que la banda fusión va poner enriba les tables nuevos y vieyos temes. Amás tamién va poder mercase esti trabayu recién asoleyáu que yá se pue descargar llibremente per Internet en Megaupload y Jamendo.

Acordies a la defensa que La Tarrancha fai pa colos Creative Commons y el llibre espardimientu de la cultura, la formación ska-fusión vien d’escolingar pa descargar “Ö-3-3” en Jamendo. Trátase esti d’un portal dixital qu’axunta a una montonera grupos qu’editen los sos trabayos baxo llicencies Creative Commons y nel que se pueden descargar los discos.

“Ö-3-3”
Grabáu el pasáu mes d’ochobre nos Tutu Estudios y asoleyáu por Algamar Producciones, “Ö-3-3” supón el primer llarga duración de La Tarrancha. Los 12 cantares que formen el discu recoyen el soníu llimpiu ska-reggae que carauteriza a la banda, un estilu qu’amestáu a otres influencies sonores forma lo qu’ellos definen como “Mecigayu Ska”.