Artista: Arma X

Reseña:
Asoleyó, nun ye mentira, asoleyó por fin el discu debú de Arma X, ex componente de los Stoned, con quien ya sacare otros trabayos, que pocu tien que ver con esti, anque queden dalgunos retales.

25 Otoños, 13 disparos... y cuanta mala cara pondrá más d'un españolón d'estos de banderola, pero esti rapaz taba hasta la poya y tuvo de dicilo namás entamar el trabayu, con un tema que suena a la época Stoned, pero que nun dexa un clavu drechu, qu’amuesa muncha rabia acumulada en toos estos años de retiru musical.

El discu sigue col tema escoyíu pal single y pa videoclip, Zona Minada, que cola collaboración de Kans (13 Palabras) nel estribillu conforma un canciu revelador de la situación d'una Asturies robada, pisotiada y cuspiada, una Asturies minada. Na mesma llinea y con otra aportación nos estribillos (grande Delfo), ta lo que pa mi ye la perla'l discu, Santa Bárbara. El de blimea tuvo'l valor de facer una versión moderna del míticu cantar mineru orientao al so estilu, y salió-y per bien, un gustazu.

Poro, la temática ye muy diversa y tamién hai tiros pa los raperos bocazas (Cuéntales), y pa una escena musical que'l raperu xulga repetitiva y vendia (Radiofórmula). Ente tolos temes nun podía faltar un guiñu a la so Cuenca Maphia, nin tampoco un cantar íntimu y personal, como ye 25 Otoños.

Nel aspeutu musical topamos munchos y mui bonos arreglos de la mano de Xel Pereda ya compañía, que-y dan muncha musicalidá'l trabayu, pero ensin perder el tonu raperu, dalgo que munchos (inclúyome) pensábemos que diba pasar; asperabase un discu muncho más fusionáu y nun ye asina. Ye rap social, politicu, cultural, pero rap, entos... ¿Qué van facer agora los puristes? Yá nun pueden mete-y manu al estilu ¿Van facelo entos a les lletres?

Nunca época na que'l hiphop ta carauterizaándose pol postureu y les pistolines, Arma X saca Terroristas, rompe Fronteras y jode'l panorama español con temes como “Por qué no te callas” o “Spain Fuck”, onde amuésanos un enfoque distintu y realista de lo que son les coses nesti estáu onde'l prau, les mines y el despemplegu sustituyen a les gorres, les joyes y les putes.

25 Otoños pa facenos alcordar que si daqué va cambiar sedrá pa peor, 25 Otoños pa facenos ver lo que ye Asturies, lo que España y lo que ye la xente, 25 Otoños pa conocer a Fran y el so entornu. Eso ye.