Esta mesma selmana dende’l portal youtube.com yá s’ufiertaba’l nuevu vidioclip d’Alfredo González del cantar “La Nada y Tú”. Fecho pol equipu humanu de Sr. Paraguas, el prósimu martes 9 de febreru va tener llugar la presentación oficial del vidioclip. A les 12 la mañana en La Caja Negra d’Uviéu va proyectase’l vidiu, regalarase un copia en DVD y amás va tar el so protagonista tocando un par de temes y retrucando a les entrugues del públicu.

Grabáu a finales de xineru nel Playón de Bayes, “La Nada y Tú” ye’l nuevu vidioclip d’Alfredo González. Esti cantar perteneciente al so discu homónimu espublizáu nel 2008 dio-y el premiu al Meyor Cantar en Llingua Asturiana y anguaño l’equipu del Sr. Paraguas – formáu por Juan Tizón, Sofia Castañón, Tato Loché, Alejandro López Riesgo y Olga Fernández- ponen-y imáxenes a la música que nel so día Alfredo González punxo-y a una lletra del escritor Antón García.

“Hai munchu que dicir d’esti vidiu y munchu qu’entruga-y al so protagonista”, afirmen dende Sr. Paraguas, asina ye como programen la presentación de la obra audiovisual el prósimu martes 9 de febreru na Caja Negra d’Uviéu. Con hora d’empiezu a les 12.00, xunto a la proyección van regalase copies en DVD del vidiu y Alfredo González echará un par de cantares col pianu y la so voz. Dende la organización afirmen que l’actu finará “tomando un vinillo y algo pa matar la gusa y charrar un ratín tranquilos”.