Como yá s’anunciara la selmana pasada, FNAST.NET entama a informar selmanalmente de les novedaes musicales d’Asturies. Nesti resumen que va del 3 al 10 de xunu, se recueyen delles informaciones relacionaes colos horarios del Derrame Rock 15, la nueva maqueta de Crudo, los ganadores del 8º Conruso de Música en Directo Abierto Hasta el Amanecer, la llibre descarga de “Ahora que duermen los grillos” del Hueso del Policarpo y l’actuación nel FAT Club de Bako.

Fai tiempu qu’esti proyeutu nun da señes de vida. Tal como tal mundu tamos toos amenazos; pero les bales del exércitu israelí nun llegaron físicamente a nós y el poder económicu al traviés del so títere nel Gobiernu español nun mos dio l’últimu tixeretazu. FNAST.NET sigue vivo, pero tien que dicir hasta llueu… anque con matices. Aporta’l branu y vese amenorgáu el tiempu y les capacidaes de la xente que día a día vino trabayando desinteresadamente nesti proyeutu informativu. Por eso hasta’l prósimu mes de setiembre FNAST.NET va echar un pigazu nel so llabor diariu, pasando a informar selmanalmente de la información musical d’Asturies.

Swing, rock and roll, soul, pop, garage... vuelven a tener abellugu otra quincena más nel Savoy Drinks & Music. Esti local xixonés vien de presentar la so programación pa los últimos quince díes de mayu na que van actuar de baldre y a partir de la medianueche un montonera de grupos de dientro y fuera d’Asturies.

L'abogada xeneral del Tribunal de Xusticia de la Xunión Europea dictaminó que'l canon dixital que s'aplica n'España ye illegal porque s'impón indiscriminadamente. "Un sistema nacional que prevé l'aplicación d'un canon por copia privada a tolos equipos, aparatos y materiales de reproducción dixital de forma indiscriminada (como pasa n'España) nun ye compatible" cola normativa comunitaria, afirma'l dictame de Verica Trstenjak.

Avérase’l 25 de mayu, fecha histórica na qu’en 1808 Asturies declaróse soberana. Por eso, dende la organización soberanista Fai! van facer alcordanza d’estos fechos con música en directo y reivindicación na “II Folixa Nacional”. Ska, rock, hip hop y electrónica van sonar nesti eventu qu’axunta les actuaciones de La Tarrancha, Arma X, Galán, Da Robotz y, per primer vegada n’Asturies, los aragoneses Mallacán. L’actu va ser el prósimu 22 de mayu en Xixón.

El Concursu de Maquetes 40 Principales d’Asturies cumple 25 años nesti 2010, por ello esti vienres 7 de mayu na Sala Estilo d’Uviéu va celebrase un conciertu perespecial pel que van pasar les formaciones que ganaron el concursu en delles ediciones. Un total de venti bandes van actuar, participando nomes más nuevos como Mystereo o Pablo Valdés, hasta grupos clásicos como UHP. L’actu va dar empiezu a partir de les 20.30 hores.

Otru añu más l’eventu cultural “Tolo d’Asturies” aporta a Llangréu. Artesanía, música folk, bandes de gaites y rock de raigañu van dase cita los díes 6, 7, 8 y 9 de mayu nuna carpa asitiada na estación d’autobuses de La Felguera. Tolos actos son gratuitos y destaquen espectáculos preparaos a costa fecha pa esti eventu como un espectáculu conxuntu ente Felpeyu y los finlandeses Frigg y l’homenaxe a la gaita, con un bayurosu númberu de participantes.

“Asturllétric”, recopilatoriu qu’axunta la rellación ente la música asturiana y la electrónica, va tener la so presentación oficial esti miércoles 5 de mayu en La Casa Posafuelles d’Uviéu. Nella, van participar les Músiques pola Oficialidá, voces de la banda sonora de la reivindicación llingüística nel 2010 col single “El ramu del día les lletres”, y Xune Elipe. Amás va haber tamién una sesión de música electrónica tradicional col Dj Da-Robotz. Va ser a les 20.30 y de baldre.

Tres de celebrar esti fin de selmana el so cuartu aniversariu puxando pola música en directo, el Savoy Drinks & Music de Xixón vien de presentar la programación pa la primer quincena de mayu. Nella, esti llocal asitiáu na cai Pelayo de Xixón sigui cola so ufierta musical de calidá y actuaciones d’estremaos grupos de dientro y fuera d’Asturies.

La Oficina Municipal de la Llingua de Xixón ta acabantes d’editar “Como nos canta la llingua”, el primer karaoke n’asturianu de la historia. Esti proyeutu presentóse esta selmana nel trescursu de les actividaes del programa “Saca la Llingua” que cada añu organiza la citada entidá. Nel trabayu se recueyen doce cantares d’ocho estremaos intérpretes asturianos contemporáneos en llingua asturiana.

Llucha obrera y xarana vuelven a xuntase otru añu más na “Folixa del 1 Mayu”. El coleutivu musical ska madrilanu San Blas Posse va ser el cabezaleru d’un eventu nel que tamién van participar les bandes folk Pelgares, hardcore/punk The Black Panthys Party, hiphop K-Nalón, punk KPE y garage Uppercuts, xunto al monologuista Cellero y dellos DJ’s. La octava edición d’esta folixa entamada pol FUSOA va celebrase’l prósimu 1 de mayu na casa sindical de Xixón.