La formación ska-punk Skama la Rede entró esti llunes 17 de mayu a grabar el so tercer discu d’estudiu. “Ye too mentira” ye’l títulu d’esti nuevu trabayu que va tar formáu por doce nuevos cantares. Nellos, la banda lluanco-candasina-maliayesa sigui la so característica llínia musical, sicasí endurecen daqué’l soníu por mor de los recientes cambios de formación. La producción musical cuerre a cargo de Sergio Rodríguez nos Tutu Estudios y la edición por L’Aguañaz.

La banda punk-rock de Cangues d’Onís Mala Reputación va presentar  «Buenas Noches!!», CD+DVD en conmemoración del so décimu aniversariu, esti xueves 6. Una pequeña proyección del DVD, una rueda de prensa y un conciertu semi-acústicu van formar parte de la presentación d’esti nuevu trabayu. L’actu va ser nel Fórum de la FNAC de Parque Principáu a les 19.00 y con entrada llibre.

Yá son cuatro años puxando pola música en directo y gratuita tolos fines de selmana y eso hai que celebralo. El prósimu 1 de mayu el Savoy Drinks & Music de Xixón va festexar el so cuartu aniversariu con una nueche perespecial. La banda rockabilly portuguesa The Dixieboys van ser los anfitriones d’un eventu nel que tamién van tocar Lucas y los Patosos, grupu xixonés de rock and roll que se reencuentra sólo pa esta ocasión. A la medianueche y de baldre arrancará’l show.

La mítica banda de rock n’asturianu Dixebra va llevar el so directu a Uxo. Esti vienres 30 d’abril, a la una de la madrugada, va actuar esta formación dientro del programa de les celebraciones por cuenta de les fiestes patronales. Dixebra van aprovechar la ocasión pa presentar nesa localidá “Amor incendiariu” (L’Aguañaz, 2009), el so nuevu trabayu.