Como yá s’anunciara la selmana pasada, FNAST.NET entama a informar selmanalmente de les novedaes musicales d’Asturies. Nesti resumen que va del 3 al 10 de xunu, se recueyen delles informaciones relacionaes colos horarios del Derrame Rock 15, la nueva maqueta de Crudo, los ganadores del 8º Conruso de Música en Directo Abierto Hasta el Amanecer, la llibre descarga de “Ahora que duermen los grillos” del Hueso del Policarpo y l’actuación nel FAT Club de Bako.

Fai tiempu qu’esti proyeutu nun da señes de vida. Tal como tal mundu tamos toos amenazos; pero les bales del exércitu israelí nun llegaron físicamente a nós y el poder económicu al traviés del so títere nel Gobiernu español nun mos dio l’últimu tixeretazu. FNAST.NET sigue vivo, pero tien que dicir hasta llueu… anque con matices. Aporta’l branu y vese amenorgáu el tiempu y les capacidaes de la xente que día a día vino trabayando desinteresadamente nesti proyeutu informativu. Por eso hasta’l prósimu mes de setiembre FNAST.NET va echar un pigazu nel so llabor diariu, pasando a informar selmanalmente de la información musical d’Asturies.

Llegaos dende Francia per primer vez a la Península Ibérica, el grupu Aluk Tolodo va actuar n’Asturies. Esta banda que trabaya un estilu noise, psicodélicu, escuru y desquiciáu con estética black metal qu’ellos mesmos definen como “occult rock” aporta al Savoy Drinks & Music de Xixón el prósimu vienres 21 de la mano de Greenmammoth. Van presentar el so nuevu trabayu “Finsternis” (Public Guitl, 2009) a partir de les 21.30 por un preciu únicu de siete euros d’entrada.

Jorge Otero, cabezaleru del grupu uvieín de rock Stormy Mondays, ta acabantes d’anunciar delles novedaes relaciones col so proyeutu musical. Per una parte, tien cita’l prósimu miércoles 19 nos estudios ACME d’Avilés pa grabar un nuevu EP. Esta grabación coincide cola estancia n’Asturies del músicu estaunidense Danny Montgomery que-yos va echar un gabitu. Pel otru, Avilés, Uviéu, Xixón y La Pola L.lena van cuntar col directo de la banda a finales de mes.

Swing, rock and roll, soul, pop, garage... vuelven a tener abellugu otra quincena más nel Savoy Drinks & Music. Esti local xixonés vien de presentar la so programación pa los últimos quince díes de mayu na que van actuar de baldre y a partir de la medianueche un montonera de grupos de dientro y fuera d’Asturies.

La formación ska-punk Skama la Rede entró esti llunes 17 de mayu a grabar el so tercer discu d’estudiu. “Ye too mentira” ye’l títulu d’esti nuevu trabayu que va tar formáu por doce nuevos cantares. Nellos, la banda lluanco-candasina-maliayesa sigui la so característica llínia musical, sicasí endurecen daqué’l soníu por mor de los recientes cambios de formación. La producción musical cuerre a cargo de Sergio Rodríguez nos Tutu Estudios y la edición por L’Aguañaz.

L'abogada xeneral del Tribunal de Xusticia de la Xunión Europea dictaminó que'l canon dixital que s'aplica n'España ye illegal porque s'impón indiscriminadamente. "Un sistema nacional que prevé l'aplicación d'un canon por copia privada a tolos equipos, aparatos y materiales de reproducción dixital de forma indiscriminada (como pasa n'España) nun ye compatible" cola normativa comunitaria, afirma'l dictame de Verica Trstenjak.

Avérase’l 25 de mayu, fecha histórica na qu’en 1808 Asturies declaróse soberana. Por eso, dende la organización soberanista Fai! van facer alcordanza d’estos fechos con música en directo y reivindicación na “II Folixa Nacional”. Ska, rock, hip hop y electrónica van sonar nesti eventu qu’axunta les actuaciones de La Tarrancha, Arma X, Galán, Da Robotz y, per primer vegada n’Asturies, los aragoneses Mallacán. L’actu va ser el prósimu 22 de mayu en Xixón.

Tres la marcha la selmana pasada de Lobo, anterior vocalista, la formación l.leniza de hardcore-punk Adizión Etílika alcuéntrense a la gueta d’un nuevu cantante. Les persones interesaes en facer una prueba con esta banda pueden facelo contautando con ellos al traviés de teléfonu o del so myspace.

El grupu folk l.lenizu La Col.lá Propinde va actuar esti vienres 7 nel Atenéu La Calzada de Xixón. Poniendo pieslle a les XV Xornaes de Llingua y Cultura, esta banda va presentar per primer vegada en Xixón los cantares de “A teyavana” (Algamar Producciones, 2010), la so tercer referencia discográfica. L’actuación va tener llugar nel Salón d’Actos del Atenéu de La Calzda a partir de les 19.00 hores, con entrada gratuita.

El Concursu de Maquetes 40 Principales d’Asturies cumple 25 años nesti 2010, por ello esti vienres 7 de mayu na Sala Estilo d’Uviéu va celebrase un conciertu perespecial pel que van pasar les formaciones que ganaron el concursu en delles ediciones. Un total de venti bandes van actuar, participando nomes más nuevos como Mystereo o Pablo Valdés, hasta grupos clásicos como UHP. L’actu va dar empiezu a partir de les 20.30 hores.

La banda punk-rock de Cangues d’Onís Mala Reputación va presentar  «Buenas Noches!!», CD+DVD en conmemoración del so décimu aniversariu, esti xueves 6. Una pequeña proyección del DVD, una rueda de prensa y un conciertu semi-acústicu van formar parte de la presentación d’esti nuevu trabayu. L’actu va ser nel Fórum de la FNAC de Parque Principáu a les 19.00 y con entrada llibre.

El folk del suroccidente asturianu va aportar esti xueves 6 de mayu a la sidrería Tierra Astur de Cualloto. La formación Brandal, finalistes nel Premiu al Meyor Cantar en Llingua Asturiana cy a los AMAS cola Meyor Canción Folk, van actuar nesti llocal a partir de les 21.30. Ellí van poder sentise los cantares del so discu “Na fonte la canalina” (Fonográfica Asturiana, 2009).

Otru añu más l’eventu cultural “Tolo d’Asturies” aporta a Llangréu. Artesanía, música folk, bandes de gaites y rock de raigañu van dase cita los díes 6, 7, 8 y 9 de mayu nuna carpa asitiada na estación d’autobuses de La Felguera. Tolos actos son gratuitos y destaquen espectáculos preparaos a costa fecha pa esti eventu como un espectáculu conxuntu ente Felpeyu y los finlandeses Frigg y l’homenaxe a la gaita, con un bayurosu númberu de participantes.